យុទ្ធនាការ “នេះមិនមែនជាអ្វី ដែលប្រជាជនកម្ពុជាចង់បាន”

ជារៀងរាល់ឆ្នាំ សត្វឆ្កែរាប់លានក្បាលត្រូវបានលួច ធ្វើបាប និងសម្លាប់ដើម្បីយកសាច់លក់នៅក្នុងប្រទេសកម្ពុជា ដែលប្រជាជនកម្ពុជាភាគច្រើនបដិសេដចំពោះការធ្វើបែបនេះ។ នេះគឺជាឱកាសល្អរបស់យើងគ្រប់គ្នាក្នុងការនិយាយ និងទាមទារការបញ្ឈប់ការជួញដូរនេះនៅកម្ពុជា។ សំឡេងរបស់អ្នកអាចជួយសង្រ្គោះសត្វឆ្កែទាំងនោះបាន។

សូមចុះឈ្មោះរបស់អ្នក និងបង្ហាញដល់ក្រសួងកសិកម្ម រុក្ខាប្រមាញ់ និងនេសាទ នូវការគាំទ្ររបស់អ្នកសម្រាប់ការបញ្ឈប់ការជួញដូរសាច់ឆ្កែនៅកម្ពុជា។

យើងស្នើសុំអ្នកចូលរួមចែករំលែកមូលហេតុ ដែលអ្នកគាំទ្រការបញ្ឈប់ការជួញដូរសាច់ឆ្កែនៅកម្ពុជា។

យើងស្វាគមន៍អ្នកក្នុងការចែករំលែករឿងរបស់អ្នក ឬពាក្យណាមួយនៃការគាំទ្រសម្រាប់ការបញ្ឈប់ការជួញដូរសាច់ឆ្កែនៅកម្ពុជា។ មតិយោបល់របស់អ្នក* នឹងត្រូវបានបង្ហាញដល់រដ្ឋាភិបាលជាមួយនឹងលិខិតខាងក្រោម ហើយនឹងជួយយើងបង្ហាញពីមូលហេតុ ដែលប្រជាជនកម្ពុជាប្រឆាំងនឹងការជួញដូរនេះ។ គ្រប់សំឡេងទាំងអស់មានសារៈសំខាន់ ដោយរួមគ្នា យើងអាចការពារសត្វឆ្កែនៅកម្ពុជា និងកសាងអនាគតប្រកបដោយក្តីមេត្តា។

• ចុចទីនេះ ដើម្បីអានលិខិត

  សូមគោរពជូនក្រសួងកសិកម្ម រុក្ខាប្រមាញ់ និងនេសាទ!

  ខ្ញុំមានការព្រួយបារម្មណ៍យ៉ាងខ្លាំងចំពោះសត្វឆ្កែរាប់លានក្បាល ដែលត្រូវបានលួចតាមផ្ទះ និងចាប់តាមដងផ្លូវ ដើម្បីធ្វើការជួញដូរនៅក្នុងប្រទេសកម្ពុជា ដែលនាំឱ្យមានការរងទុក្ខយ៉ាងខ្លាំងចំពោះសត្វឆ្កែ បង្កើតឱ្យមានសកម្មភាពលួចសត្វចិញ្ចឹម និងហានិភ័យធ្ងន់ធ្ងរដល់សុខភាពមនុស្ស និងសត្វ។

  ជារៀងរាល់ឆ្នាំ សត្វឆ្កែប្រមាណ ៣ លានក្បាល ត្រូវបានចាប់ ដឹកជញ្ជូន និងសម្លាប់ក្រោមលក្ខខណ្ឌដ៏គួរឱ្យរន្ធត់។ សត្វ​ចិញ្ចឹម​ជាច្រើន​ត្រូវ​បាន​គេ​លួច ចាប់​ពី​ផ្ទះ​របស់​ពួក​គេ​មក​ដាក់​ក្នុង​ទ្រុង​ដោយ​គ្មាន​អាហារ ឬ​ទឹក ទើប​ត្រូវ​បាន​សម្លាប់​ដោយ​អមនុស្សធម៌​តាម​រយៈ​ការ​ឆក់ រោលភ្លើង និង​ជ្រមុជទឹកជាដើម​។

  ការជួញដូរនេះ មិនត្រឹមតែអមនុស្សធម៌ប៉ុណ្ណោះទេ ថែមទាំងមានគ្រោះថ្នាក់ទៀតផងសម្រាប់សុខភាពសាធារណៈ។ ការសិក្សាបានបង្ហាញថា ការផ្ទុះជំងឺឆ្កែឆ្កួត និងការរីករាលដាលនៃជំងឺឆ្លងពីសត្វទៅមនុស្ស (zoonotic ​disease) ត្រូវបានផ្សារភ្ជាប់ដោយផ្ទាល់ទៅនឹងការចាត់ចែង និងការសម្លាប់សត្វឆ្កែយកសាច់។ សកម្មភាពលួចសត្វចិញ្ចឹមខុសច្បាប់ ដែលទាក់ទងនឹងការជួញដូរនេះ បានបង្កគ្រោះថ្នាក់ដល់សហគមន៍។

  យោងតាមការស្ទង់មតិ FOUR PAWS ក្នុងឆ្នាំ ២០១៩ មានតែ ១២% នៃប្រជាជនកម្ពុជាប៉ុណ្ណោះ បរិភោគសាច់ឆ្កែជាប្រចាំ។ លើសពីនេះ ការរកឃើញពីការស្ទង់មតិដែលបានធ្វើឡើងនៅទូទាំងប្រទេសកម្ពុជានៅដើមឆ្នាំ ២០២១ បានគូសបញ្ជាក់អំពីការស្នើសុំក្នុងការបញ្ឈប់ការជួញដូរសាច់ឆ្កែនេះនៅកម្ពុជា។ ការស្ទង់មតិបានបង្ហាញពីចំណុចសំខាន់ៗដូចខាងក្រោម៖

  • ប្រជាជនកម្ពុជា ៨៦% ប្រឆាំងការជួញដូរសាច់ឆ្កែ។
  • ៩០% នៃប្រជាជនកម្ពុជាគាំទ្រការហាមឃាត់ទាំងស្រុងលើការជួញដូរសាច់ឆ្កែ។
  • ៩៤% ជឿថាការទទួលទានសាច់ឆ្កែមិនមែនជាផ្នែកមួយនៃវប្បធម៌ខ្មែរ ហើយមិនចង់ឱ្យការជួញដូរសាច់ឆ្កែនេះបន្តទៀតដែរ។

   

  ប្រទេសកម្ពុជាបានចាត់វិធានការជាវិជ្ជមានរួចហើយក្នុងការការពារសត្វឆ្កែ និងសុខភាពសាធារណៈ ដោយខេត្តសៀមរាបបានហាមប្រាមការជួញដូរសាច់ឆ្កែនៅឆ្នាំ ២០២០។ ប៉ុន្តែបើគ្មានការហាមឃាត់ថ្នាក់ជាតិទេ ការជួញដូរដ៏ឃោរឃៅនេះនៅតែបន្តដំណើរការ និងរីកចម្រើន។

  ខ្ញុំសូមស្នើសុំដោយគោរពឱ្យក្រសួង សហការ ជាមួយស្ថាប័នរដ្ឋាភិបាលផ្សេងទៀត ដើម្បីដោះស្រាយកង្វល់របស់ប្រជាជនកម្ពុជាភាគច្រើន និងចាត់វិធានការថ្នាក់ជាតិ ដើម្បីបញ្ឈប់ការជួញដូរសាច់ឆ្កែ។ នេះនឹងរួមចំណែកយ៉ាងសំខាន់ក្នុងការការពារប្រជាជនកម្ពុជា និងសត្វចិញ្ចឹមរបស់ពួកគេ។ ប្រជាជនកម្ពុជាបានបង្ហាញយ៉ាងច្បាស់ថា ពួកគេមិនចង់បានការជួញដូរប្រភេទនេះនៅក្នុងប្រទេសរបស់ពួកគេទេ។  ពេលវេលាសមស្រប ដើម្បីធ្វើសកម្មភាព គឺការចាប់ផ្តើមឥឡូវនេះ។

  សូមអរគុណចំពោះការដឹកនាំរបស់ក្រសួងលើបញ្ហាសំខាន់មួយនេះ។ យើងទន្ទឹងរង់ចាំមើលប្រទេសកម្ពុជាបោះជំហានជាប្រវត្តិសាស្ត្រ ដើម្បីការពារសត្វចិញ្ចឹម ការពារសុខភាពសាធារណៈ និងលើកតម្កើងកេរ្តិ៍ឈ្មោះអន្តរជាតិ។

  ដោយក្តីគោរព,
  អ្នកស្រលាញ់សត្វឆ្កែ

^{* មតិរបស់អ្នកនឹងជាអនាមិក - ឈ្មោះ និងព័ត៌មានលម្អិតរបស់អ្នកនឹងមិនត្រូវបានផ្តល់ឱ្យរដ្ឋាភិបាលទេ។}